मन्त्री अधिकारी सहित सातैजनाको शव श्रद्धाञ्जलीको लागी टुडिखेलमा

ताप्लेजुङमा हेलिकप्टर दुर्घटनामा निधन भएका पर्यटनमन्त्री रवीन्द्र अधिकारीसहित सात जनाको शवको पोस्टमार्टम सकिएको छ। त्रिवि चिकित्साशास्त्र अध्ययन संस्थानका फरेन्सि मेडिसिन विभागका निमित्त विभागिय प्रमुख डा रिजेन श्रेष्ठकाअनुसार बिहीबार राति सवा १ बजे सातैवटा शवको पोष्टमार्टमपछि पहिचान भएको हो।

बिहीबार दिउँसो शवको पोस्टमार्टम नसकिँदा टुँडिखेलमा हुने भनिएको श्रद्धाञ्जली कार्यक्रम स्थगित भएको थियो । हिजो तीन बजेपछि हुने भनिएको श्रद्धाञ्जली कार्यक्रम आज बिहान आठ बजेका लागि सारिएको छ। आज ८ बजेदेखि ११ बजेसम्म श्रद्धाञ्जली कार्यक्रम राखिएको छ । गत बुधवार मन्त्री अधिकारीसहित सात जना सवार हेलिकोप्टर दुर्घटनामा परेको थियो ।

सरकारले बुधबार ताप्लेजुङमा हेलिकोप्टर दुर्घटना हुँदा निधन भएका पर्यटनमन्त्री अधिकारीसहित सातै शव श्रद्धाञ्जलीका लागि टुँडिखेलमा तयारी पूरा गरेको थियो। श्रद्धाञ्जली दिन राष्ट्रपति विद्यादेवी भण्डारी, प्रधानमन्त्री केपी शर्मा ओलीलगायत उच्चपदस्थ व्यक्तित्व, राजनीतिक दलका नेता पुग्ने तयारी थियो भने आम सर्वसाधारणको भिड टुँडिखेलमा बढेको थियो। पोष्टमार्टम नसकिएपछि आजका लागि सारिएको हो ।

ताप्लेजुङमा दुर्घटना भएको एअर डाइनेस्टीको हेलिकप्टरमा संस्कृति, पर्यटन तथा नागरिक उड्डयनमन्त्री अधिकारी, यति एअरलाइन्सका प्रवन्ध निर्देशक तथा स्थापित पर्यटन उद्यमी आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ, नेपाल नागरिक उड्डयन प्राधिकरणका निर्देशक ध्रुवदास भोछिभया, प्रधानमन्त्री कार्यालयका उपसचिव युवराज दाहाल, हेलिकप्टरका चालक प्रभाकर केसी र मन्त्रीका अंगरक्षक नेपाली सेनाका जमदार अर्जुन घिमिरे सवार हुनुहुन्थ्यो ।

आज टुडिखेलमा श्रद्धाञ्जलीपछि परिवारको इच्छाअनुसार अन्त्येष्टीका लागि लगिने छ । सरकारले परिवारको इच्छाअनुसार अन्त्येष्टी गर्न सहयोग गर्ने जानकारी दिइसकेको छ ।

शुक्र, फाल्गुन १७, २०७५ मा प्रकाशित सुनौलो नेपाल अनलाइनद्वारा संचालित सुनौलो नेपाल टी. भीसंग प्रत्यक्ष जोडिन यहाँ क्लिक गर्नुहोस