अब देखि अमेरिकामा ग्रिनकार्ड पाउनै मुश्किल

साउन २८ काठमाडौं अमेरिकी राष्ट्रपति डोनाल्ड ट्रम्प प्रशासन आप्रबासीमाथि थप कठोर बन्ने भएको छ । अवैध आप्रबासीप्रति कठोर देखिएको ट्रम्प प्रशासन अब वैध आप्रबासीप्रति पनि कठोर बन्ने तयारी गरेको छ । वैध तर गरिब आप्रबासीहरुका लागि उनीहरुको भिसा अवधि बढाउन या स्थायी बसोबास स्वीकृति ग्रिन कार्ड पाउने प्रक्रिया कठोर बनाउने तयारी भएको हो ।

नयाँ नियमले सरकारी अनुदानमा भर परेका आप्रबासीलाई अब भिसा अवधि बढाउन या ग्रिन कार्ड लिनका लागि कठिन हुनेछ । खाद्यान्न तथा सार्वजनिक बसोबासका लाग एक वर्ष भन्दा बढी समय सरकारी राहत लिनेहरुको भिसा अवधि नबढाउने या ग्रिन कार्ड प्रदान नगर्ने व्यवस्था नयाँ नियममा लागु हुनेछ ।भविष्यमा पनि सरकारी राहतमै भर पर्ने देखिएमा यस्ता आप्रबासीले भिसा अवधि बढाउन या ग्रिन कार्डका लागि दिएको निवेदन अस्वीकार गर्ने अधिकार सरकारसँग रहने व्यवस्था गर्न लागिएको हो ।

नयाँ नियमले आत्मनिभरताको अवधारणलाई बढावा दिने सरकारी अधिकारीले बताएका छन्। पब्लिक चार्ज रुल नाम दिइएको नयाँ नियम सोमबार फेडेरल रजिस्टरमा प्रकाशित भएको छ । यो नियम आउँदो अक्टोबर १५ देखि लागु हुनेछ । यो नियम ग्रिन कार्ड पाइसकेका तर सरकारी राहत लिइरहेकाहरुलाई लागु हुँदैन । यस्तै शरणार्थी तथा आश्रयका लागि आवेदन दिनेहरुमा लागु हुँदैन ।

तर भिसा अवधि बढाउन ग्रिन कार्ड प्राप्त गर्न तथा अमेरिकी नागरिकताका लागि आवेदन दिनेहरुमा यो नियम लागु हुनेछ । यस्ता आवेदकहरु जसको आयको स्तर निकै न्यून छ र सरकारी राहतमा भर पर्ने देखिएमा उनीहरुको निवेदनमा अस्वीकार गर्ने व्यवस्था नियममा छ । अमेरिकामा हाल दुई करोड २० लाख आप्रबासी छन् जसको अमेरिकी नागरिकता छैन नयाँ नियमले उनीहरु प्रभावित हुने छन् ।

मङ्ल, साउन २८, २०७६ मा प्रकाशित सुनौलो नेपाल अनलाइनद्वारा संचालित सुनौलो नेपाल टी. भीसंग प्रत्यक्ष जोडिन यहाँ क्लिक गर्नुहोस