काठमाडौं । राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले नेपाली फुटबल समर्थकसँग माफी मागेका छन् ।

उनले एक अनलाइन मिडियालाई दिएको अन्तर्वार्ताको विषयमा माफी मागेका हुन् ।

अलमुताइरीले एक अनलाइनसँगको अन्तर्वार्तामा पहिले नेपाली फुटबल खेलाडीहरु नतिजाका लागि भन्दा पनि नयाँ देश हेर्न र घुम्न मात्र जाने गरेको र आफ्नो आगमनपछि राम्रो नतिजा आएको बताएका थिए । उनको त्यस अभिव्यक्ति पछिल्लो समय विवादमा आएको थियो । 

उनले केही दिनअघि सामाजिक सञ्जाल फेसबुकमार्फत नै एन्फाका वरिष्ठ उपाध्यक्ष पंकज राईका कारण आफूले राजीनामा दिन लागेकाे भनी उल्लेख गरेका थिए । अहिले उनी यही कारण पनि विवादमा तानिएका छन् । उनकाे याे विवाद खेलकुद मन्त्रालयसम्म पुगेकाे छ ।