काठमाडौं । जयसिंह धामी महाकालीमा बेपत्ता भएको घटनाको विरोधमा युवा संघले प्रदर्शन गरेको छ । सोमबार दिउँसो नेकपा (एमाले) माधव नेपाल निकट युवा संघले भारतीय दूतावास अगाडि प्रदर्शन गरेको हो ।
एसएसबीले दार्चुलामा तुइन तर्ने क्रममा जयसिंहलाई महाकालीमा खसालेको भन्दै युवा संघले त्यसको विरोधमा प्रदर्शन गरेको हो ।
‘भारतीय विस्तारवाद मुर्दावाद, जयसिंह महराको हत्यारा पहिचान गरी कारबाही गर, नेपालीमाथिको भारतीय एसएसबी ज्यादती बन्दर गर, जयसिंह महराको मृत्यु होइन, हत्या हो’ जस्ता नारा लगाउँदै युवा संघले प्रदर्शन गरेको हो । युवा संघले जयसिंहको परिवारलाई राहतको व्यवस्था गर्नसमेत माग गरेको छ।
संघले घटनाको छानबिन गरेर दोषीमाथि कारवाही गर्न माग गरेको हो । भारतीय दूतावास अगाडि लैनचोरमा पुगेर संघले प्रदर्शन गरेको हो ।
शुक्रबार एसएसबीले महाकाली तर्दैगर्दा तुइन काटिदिएपछि जयसिंह बेपत्ता भएको प्रत्यक्षदर्शीले बताएका छन् । गृह मन्त्रालयले घटनाको छानबिन भइरहेको बताएको छ । घटनाको चौतर्फी विरोध भएपछि सरकारले गृहसचिवको नेतृत्वमा पाँच सदस्यीय छानबिन समिति बनाएको छ ।
तस्बिर रमेशकुमार परियार