सिन्धुली । जंगली हात्तीले सिन्धुलीको दुधौली नगरपालिका–३ कालापानीमा पसनः ७ घर भत्काएको छ । दुधौलीकै वडा नम्बर ११ पत्रिङ्गामा चाररातमा २८ घर भत्काएका जंगली हात्तीकै बथानले उत्तरतर्फ आएर मंगलबार राति ७ घर भत्काएका हुन् ।
तीन वटा जंगली हात्तीले कालापानीमा ७ घर भत्काएको र भकारीको करिब ३० मुरी धान खाएको वडाध्यक्ष साने धामीले जानकारी दिए । उनका अनुसार कालापानीका स्थानीय दिपलाल धामी, प्रेमलाल कुमर, रितलाल कुमर, रती धामी, दोर्जे मोक्तान, तेजनाथ अधिकारी र बालकुमारी धामीको घर जंगली हात्तीले भत्काइदिएको छ ।
डिभिजन वन कार्यालय सिन्धुलीले कोसीटप्पु वन्यजन्तु आरक्षबाट पर्सा राष्ट्रिय निकुञ्जमा आउजाउ गर्ने क्रममा ती हात्ती अहिले दुधौली नगरपालिकाको विभिन्न वडामा क्षति पुर्याएको जनाएको छ । हात्तीलाई आफ्नो बाटो निर्बाध हिँड्न दिनु पर्ने र जिस्क्याएर आतंकित बनाउन नहुने कार्कीले बताए ।
जंगली हात्ती वर्षमा एकदेखि दुईपटक एक निकुञ्जबाट अर्को निकुञ्जमा बसाई सर्ने र उनिहरुले बसाइँ सर्दा पुस्तौंदेखि प्रयोग गर्दै आएको आफ्नै बाटो (रुट) प्रयोग गर्ने भएका कारण हात्ती दुधौलीमा देखा परेका उनको भनाइ छ ।
स्थानीयका अनुसार अहिले पनि दुई हात्ती कालापानी नजिकैको झुँगार अर्को एउटा हात्ती कालापानी जंगलमा घुमिरहेको छ । धुनी बालेर रातभर बस्दासमेत हात्ती आएर क्षति पुर्याएको उनिहरुको गसनासो छ । दुधौली नगरपालिकामा जंगली हात्तीको समूह प्रवेशसँगै जनजीवन त्रसित छ । सिन्धुलीको दसधौलीमा गत सातादेखी जंगली हात्ती देखा परेका थिए ।