सिरहा । आमहड्तालको उल्लंघन गरेको भन्दै पूर्व–पश्चिम राजमार्ग अन्तर्गत सिरहाको विभिन्न स्थानमा सीके राउत नेतृत्वको जनमत पार्टीका कार्यकर्ताहरुले सवारी साधनमा तोडफोड तथा आगजानी गरेका छन् ।
आज बिहान आमहड्तालको उल्लंघन गरेको भन्दै जनमत पार्टीका कार्यकर्ताहरुले मिर्चैया र गोलबजारमा दर्जनौं सवारी तोडफोड गरेका थिए । आमहड्तालका कारण सिरहामा यातायात, शैक्षिक संस्था, उद्योग, कलकारखाना र बजार ठप्प भएको छ । उनिहरुले ना ५ ख ५५२२ नम्बरको टिपरमा जनमतका कार्यकर्ताले आगो लगाएका हुन् ।
सिरहाको औरही गाँउपालिकाले गहुंको बीउ लुटेको भन्दै चार जनामाथि मुद्दा दर्ता गराएको र प्रहरीले एक जनालाई पक्राउ गरेको विरोधमा जनमत पार्टीले आन्दोलन घोषणा गरेको हो ।
किसानहरुमाथि लगाएको मुद्दा फिर्ता लिनुपर्ने, पक्राउ परेका किसानलाई रिहा गर्नुपर्ने, किसानलाई समयमा मलखाद उपलब्ध गराउनुपर्ने, गाउपालिका अध्यक्ष सिदार्थ यादवले भ्रष्टाचार गरेकाले छानबिन गर्नुपर्ने लगायतका माग जनमत पार्टीले राखेको छ ।