विश्वकपमा नेपाली टोली छनोट हुने सम्भावना राम्रो छ : प्रशिक्षक हर्षल पाठक

सुनौलो नेपाल

मंगलवार , पौष ८, २०८२

विश्वकपमा नेपाली टोली छनोट हुने सम्भावना राम्रो छ : प्रशिक्षक हर्षल पाठक

काठमाडौं । नेपाली राष्ट्रिय महिला क्रिकेट टिमका नवनियुक्त मुख्य प्रशिक्षक हर्षल पाठकले विश्वकपमा नेपाली टोली छनोट हुने सम्भावना राम्रो देखेको बताएका छन् ।

मंगलबार काठमाडौंको मूलपानी मैदानमा नेपाल क्रिकेट संघ (क्यान)ले आयोजना गरेको पत्रकार अन्तक्र्रियामा पाठकले नेपाली महिला टीमको खेल आफूले हेरेको भन्दै टीमको पछिल्लो प्रदर्शन हेर्दा विश्वकपमा छनोट हुने सम्भावना राम्रो देखेको बताएका हुन् ।

नेपाल आएपछि उनको क्रिकेट वातावरण उत्साहपूर्ण पाएको उनले बताए । मुख्य प्रशिक्षक पाठकले टीमको योजनालाई प्रभावकारी ढंगले कार्यान्वयन गर्न सके उत्कृष्ट नजिता आउने धारणा राखे । प्रशिक्षणका क्रममा खेलाडीहरुको प्रदर्शन हेर्दा फिल्डिङलाई अलि ध्यान दिनुपर्ने देखिएपनि समग्र रुपमा सुधार आउन धेरै समय नलाग्ने विश्वास व्यक्त गरे ।

क्यानले दुई बर्षका लागि पाठकलाई महिला टीमको मुख्य प्रशिक्षकमा नियुक्त गरेको हो । नेपाली महिला टोलीले जनवरी १४ देखि फेब्रुअरी १ सम्म घरेलु मैदानमै आईसीसी महिला टी–२० विश्वकपको ग्लोबल छनोट खेल्दैछ । नेपालले ग्लोबल छनोटको पहिलो खेल थाइल्यान्डसँग खेल्नेछ ।

नेपाल, थाइल्याण्ड रहेको समूह बी मा जिम्बावे, नेदरल्यान्ड्स र स्कटल्यान्ड छन् । समूह ए मा बंगलादेश, आयरल्यान्ड, नामिबिया, पपुवा न्युगिनी र अमेरिका छन् । दुवै समूहका शीर्ष ३ टोली सुपर सिक्समा पुग्नेछन् भने छनोटका शीर्ष ४ टोलीले अर्को वर्ष आइसिसी महिला टि ट्वान्टी विश्वकप खेल्नेछन् ।