बहिष्करणमा पारिएका आवाजहरु

एकाकार भएर

प्लेकार्ड उठाउँदै

सडकमा पोखिएका छन ।

सडकको चौडा छाती कुल्चदै

जुलुस निस्किएका छन

असमान संवैधानिक धाराहरुको

खारेजीको माग राखी

भूमीहीन जुलुसमा सामेल छन

अनागरिक जुलुसमा सामेल छन

जुलुस न्यायको माग गर्दै

अदालत परिसर पुगेको छ

इजलासहरु बन्द गरिएका छन

न्यायिक निकाय मौन छ ।

म स्वतन्त्र पर्यवेक्षक

जुलुस नियालि रहेको छु

जुलुस विद्रोहको संकेत हो

जुलुसमा आक्रोश छ

जुलुसमा घृणा छ

अत्याचारले थिचिएका पात्रहरु

उन्मुक्तिको नारा उठाई रहेछन

अदालतको ढोका बन्द गरिए पछि ल

जुलुस अनियन्त्रित भै

सरकार विरुद्ध

चर्का नारा लगाउन वाध्य छ

सरकार !

हामीलाई न्याय दे

हाम्रा माग पूरा गर

धर पकड बन्द गर

गगनभेदी नारा लगाएर

पाखुरामा कालो पट्टि बाँधि

विरोधको चर्को रुप

प्रदर्शन गरिरहेछ जुलुुस ।

म ठान्छु

न्यायोचित छन

जुलुसका नारा र मागहरु

म आशावादी छु

पूरा हुने छन जायज मागहरु

आन्दोलन भड्कने छैन

हुने छैन

आगजनी तोडफोड र लुटपाटहरु

हिंसा र प्रतिहिंसाका घटनाहरु ।

सरकार !

शान्तिपूर्ण अवतरण गराइयोस

तिम्रा विरुद्ध उठेका जुलुसहरु

तिमी मानव अधिकारका कुरा उठाउँछौ

र मानव अधिकार उल्लङघन गर्छौ

तिमी स्वतन्त्रताको कुरा उठाउँछौ

र स्वतन्त्रताको उपहास गर्छौ

तिम्रो दो जिब्रे नीति

जुलुसलाई मान्य छैन

जुलुस अगाडि बढि सक्यो

तिम्रो पासा पल्टाउनलाई ।

– प्रकाशचन्द्र खतिवडा

सुन्दरहरैंचा –६, दुलारी, मोरङ