एजेन्सी । भारतको पश्चिमी उत्तर प्रदेशमा हालै गर्भावस्थासम्बन्धी एक अचम्मको घटना बाहिर आएको छ। अचम्म नहोस् पनि किन ! जब भ्रुण महिलाको पाठेघरमा नभई कलेजोमा हुर्किरहेको थियो ।

बुलन्दशहर जिल्लाको दस्तूरा गाउँकी ३५ वर्षीया सर्वेशले भोगेको यो घटनाले अहिले धेरै वरिष्ठ चिकित्सक र शोधकर्ताहरूको ध्यान खिचिरहेको छ । आखिर यो कसरी भयो र सर्वेश अहिले कस्तो अवस्थामा छिन् ? भन्ने जान्नका लागि बीबीसी हिन्दीको टिम उनको घरमा पुगेर वास्तविकता उल्लेख गरेको छ ।

बीबीसीको टिम सर्वेशको घर पुग्दा उनी खाटमा पल्टिरहेकी भेटिइन्। उनको पेटमा ठूलो र फराकिलो पेटी बाँधिएको थियो । विस्तारै कोल्टे फेर्दै उनले भनिन् ‘पेटको दायाँ भागको, माथिल्लो हिस्सामा २१ वटा टाँका लगाइएका छन्।’

उनलाई चिकित्सकले गह्रुंगो वस्तु उठाउन निषेध गरेको छ भने अत्यन्त हल्का खाना खान र धेरै आराम गर्न सुझाव दिएका छन्। सर्वेशलाई खाटमा बसाउनदेखि बाथरुम लैजाने, कपडा फेर्नेसम्मका सबै कामका लागि उनको श्रीमान् परमवीरको सहयोग लिनुपर्छ।

सर्वेश र उनका श्रीमान् परमवीरको भनाइमा परिवारका लागि बितेका तीन महिना निकै कष्टकर रह्यो ।

के भएको थियो ?

सर्वेशका अनुसार उनलाई अत्यधिक वाकवाकी हुने, थकान महसुस हुने र दुखाइ पनि हुने गर्थ्यो। दिनानुदिन स्वास्थ्य झनै बिग्रिन थालेपछि उनी चेकजाँचका लागि अस्पताल गइन् । त्यहाँ उनलाई चिकित्सकले अल्ट्रासाउन्ड गर्न सुझाव दिए। तर, अल्ट्रासाउन्डको रिपोर्टमा खासै केही देखिएन र उनलाई पेटको सङ्क्रमणको औषधि दिइयो ।

एक महिनासम्म औषधि खाँदा पनि स्वास्थ्यमा कुनै सुधार नदेखिएपछि उनी पुनः अल्ट्रासाउन्ड गराउन गइन्।

यसपटकको रिपोर्ट यति आश्चर्यचकित र दुर्लभ थियो कि चिकित्सकहरूका लागि पनि विश्वास गर्न गाह्रो भइरहेको थियो।

‘तपाईंको कलेजोमा बच्चा छ’

अल्ट्रासाउन्ड गर्ने चिकित्सक डा.सानिया जेहराले सर्वेशलाई कलेजोमा बच्चा भएको कुरा जब सुनाइन्, उनी र उनको श्रीमान् परमवीर चकित परे ।

उनीहरुलाई चिकित्सकको कुरामा विश्वास नै लागेन र बुलन्दशहरबाट मेरठ पुगे र पुनः एक पटक अल्ट्रासाउन्ड तथा एमआरआई गराए। फेरि पनि रिपोर्टमा कलेजोमा बच्चा हुर्किरहेको देखियो ।

सर्वेशका लागि यसमा विश्वास गर्न गाह्रो हुनुको कारण थियो उनको महिनावारी । उनको महिनावारीमा कुनै फेरबदल थिएन, उनी नियमित महिनावारी भइराखेकी थिइन् ।

एमआरआई गर्ने रेडियोलोजिस्ट डा. केके गुप्ताले आफ्नो २० वर्षको करियरमा उनले यस्तो केस कहिल्यै नदेखेको बीबीसीले उल्लेख गरेको छ ।

उनले भने, “महिलाको कलेजोको दायाँ भागमा १२ हप्ताको गर्भावस्था थियो, जसमा कार्डियाक पल्सेशन अर्थात् धड्कन स्पष्ट देखिन्थ्यो। यस अवस्थालाई इन्ट्राहेपाटिक एक्टोपिक प्रेग्नेन्सी भनिन्छ, जुन आफ्नै किसिमको दुर्लभ अवस्था हो। यस्तो परिस्थितिमा महिलामा अत्यधिक रक्तस्राव हुन्छ, जसलाई उनीहरूले सामान्य महिनावारी ठान्छन् र गर्भावस्था पत्ता लगाउन ढिला हुन्छ।”

शल्यक्रिया नै अन्तिम विकल्प

चिकित्सकका अनुसार भ्रुण ठूलो हुँदै जाँदा यस्तो अवस्थामा कलेजो फाट्ने खतरा रहन्छ। यस्तो अवस्थामा न बच्चा बाँच्नेछ, न आमा। त्यसैले शल्यक्रिया बाहेक अर्को कुनै विकल्प थिएन ।

सर्वेशका पति परमवीरको भनाइमा, बुलन्दशहरमा कुनै पनि चिकित्सक यो केस लिन तयार भएनन्। उनी मेरठ पनि गए, तर त्यहाँ पनि निराशा मात्र हात लाग्यो।

यो एक जटिल केस भएको र यसमा आमा र बच्चा दुवैको ज्यानलाई खतरा हुने भन्दै उनीहरूलाई दिल्ली जान सुझाव दिए।

सर्वेशको भनाइमा, ‘‘हामी गरीब हौं र हाम्रो लागि दिल्ली गएर त्यहाँको खर्च धान्नु सम्भव थिएन। धेरै पटक डधुप गरेपछि हामीले यहीँ उपचार गर्ने निर्णय गर्यौं।’’

अन्ततः मेरठको एक निजी अस्पतालमा चिकित्सकहरूको टोली सर्वेशको शल्यक्रियाका लागि तयार भयो। उक्त टोलीकी सदस्य पारुल दहियाले भनिन्, ‘‘जब बिरामी मेरोमा आइन्, उनी तीन महिना देखि पीडामा थिइन्। उनीसँग अल्ट्रासोनोग्राफी र एमआरआईको प्रतिवेदन थियो, जसमा स्पष्ट देखिएको थियो कि यो इन्ट्राहेपाटिक एक्टोपिक प्रेग्नेन्सीको मामला हो। हामीले वरिष्ठ शल्य चिकित्सक डा। सुनील कंवलसँग यसबारे कुरा गर्यौं, किनकि यस्तो अवस्थामा सर्जन आवश्यक पर्छ। उनी पनि राजी भए र त्यसपछि बिरामीको शल्यक्रिया गरियो।’’

चिकित्सकहरूको अनुसार यो शल्यक्रिया डेढ घण्टा सम्म चल्यो। अहिले सर्वेश अप्रेशनको घाउ निको हुने पार्खाईमा छिन् ।

बीबीसी हिन्दीबाट