प्रतिनिधिसभा बैठक बस्दैः गृह, अर्थ र रक्षासहित १० निकायको बजेटमाथि छलफल हुने, खर्च कटौतीको प्रस्ताव पेस गरिँदै

सुनौलो नेपाल

मंगलवार , आषाढ २, २०८३

प्रतिनिधिसभा बैठक बस्दैः गृह, अर्थ र रक्षासहित १० निकायको बजेटमाथि छलफल हुने, खर्च कटौतीको प्रस्ताव पेस गरिँदै

काठमाडौं । संघीय संसद्अन्तर्गत प्रतिनिधिसभाको बैठक आज बिहान ११ बजे बस्दैछ । बैठकमा विनियोजन विधेयक, २०८३ अन्तर्गत विभिन्न मन्त्रालय तथा निकायको बजेटमाथि छलफल जारी रहने कार्यसूची रहेको छ।

आजको बैठकमा विज्ञान, प्रविधि तथा नवप्रवर्तन मन्त्रालय, कानुन, न्याय तथा संसदीय मामिला मन्त्रालय, पूर्वाधार विकास मन्त्रालय, गृह मन्त्रालय, ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय, अर्थ मन्त्रालय, रक्षा मन्त्रालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय तथा राष्ट्रपति र उपराष्ट्रपतिको कार्यालयको बजेटमाथि एकीकृत रूपमा छलफल हुने छ।

छलफलका क्रममा विभिन्न सांसदहरूले मन्त्रालयहरूको खर्च रकम घटाउने प्रस्ताव पनि प्रस्तुत गर्नेछन् । सांसद गुरु प्रसाद बराल, रमेश कुमार मल्ल, विष्णुमाया विक, ऐनबहादुर महर, पुष्पराज कँडेल र पद्माकुमारी अर्यालले सम्बन्धित मन्त्रालयहरूको खर्च रकम घटाई एक रुपैयाँ कायम गरियोस् भन्ने खर्च कटौती प्रस्ताव पेश गर्ने कार्यसूची रहेको छ ।