काठमाडौँ । नेपालको फिक्सड ब्रोडब्यान्ड (इन्टरनेट) बजारमा नेपाल टेलिकम, डिशहोम र भायनेटलाई निकै पछि पार्दै वर्ल्डलिङ्क कम्युनिकेसन्स लिमिटेडले आफ्नो बलियो बर्चस्व कायम राख्न सफल भएको छ ।

नियामक निकाय दूरसञ्चार प्राधिकरणले दिएकाे तथ्याङ्कअनुसार कुल ग्राहक संख्या र बजार हिस्सा दुवैमा वर्ल्डलिङ्क सबैभन्दा अगाडि देखिएको हो । इन्टरनेट सेवा प्रदायकहरू मध्ये वर्ल्डलिङ्क कम्युनिकेसन्स लिमिटेड १० लाख ७८ हजार ७०९ ग्राहकसहित पहिलो स्थानमा छ । कम्पनीले कुल बजारको ३०.९३ प्रतिशत हिस्सा ओगटेको छ । यो संख्या दोस्रो स्थानमा रहेको कम्पनीको भन्दा झन्डै तेब्बर बढी हो, जसले बजारमा वर्ल्डलिङ्कको बलियो पकडलाई प्रष्ट पारेकाे छ।

फिक्सड ब्रोडब्यान्ड बजारमा दोस्रो, तेस्रो र चौथो स्थानका लागि सेवा प्रदायकहरूबीच तीव्र प्रतिस्पर्धा देखिएको छ । सरकारी स्वामित्वको नेपाल दूरसञ्चार कम्पनी लिमिटेड (नेपाल टेलिकम) ३ लाख ८३ हजार १०१ ग्राहक (१०.९८ प्रतिशत बजार हिस्सा) सहित दोस्रो स्थानमा रहन सफल भएको छ । टेलिकमलाई डिश मिडिया नेटवर्क लिमिटेड (डिशहोम) ले ३ लाख ६९ हजार २१८ ग्राहक (१०.५९ प्रतिशत हिस्सा) सहित तेस्रो स्थानमा रहेर कडा टक्कर दिइरहेको छ ।

त्यस्तै, पुरानाे इन्टरनेट सेवा प्रदायक भायनेट कम्युनिकेसन लिमिटेड ३ लाख ६३ हजार ३७ ग्राहक र १०.४१ प्रतिशत बजार हिस्साका साथ चौथो स्थानमा छ । यी तीनवटै कम्पनीको बजार हिस्सा १० देखि ११ प्रतिशतको आसपास रहेकाले आगामी दिनमा यिनीहरूबीचको प्रतिस्पर्धा अझै रोचक हुने देखिन्छ ।

शीर्ष पाँचभित्र पर्न सफल अर्को कम्पनी क्लासिक टेक प्रा. लि. हो, जसको बजार हिस्सा ८.२३ प्रतिशत रहेकाे छ । क्लासिक टेकका ग्राहक २ लाख ८६ हजार ९५३  जना रहेका छन् । यसैगरी, छैटौँ स्थानमा छ– सुबिसु केबलनेट लिमिटेड । सुबिसुका  २ लाख ६४ हजार ८४९ ग्राहक छन् । यसकाे बजार हिस्सा ७.५९ प्रतिशत  रहेकाे छ ।  वेबसर्फर नेपाल ४.९७ प्रतिशत हिस्साका साथ सातौँ स्थानमा छ ।

पछिल्लो समय भित्रिएका नयाँ सेवा प्रदायकहरू जस्तै वाइफाइ नेपाल, सीजी नेटले बजार हिस्सा बढाइ रहेकाे छन् । वाइफाइ नेपालकाे बजार हिस्सा ३.२० प्रतिशत र सीजी नेटकाे २.५९ प्रतिशत रहेकाे छ ।  उपभोक्ता तान्नका लागि भइरहेको मूल्य र गतिको प्रतिस्पर्धाले आगामी दिनमा यो बजार अझै विस्तार हुने अनुमान गरिएको छ ।

शीर्ष २० इन्टरनेट सेवा प्रदायकहरूको विस्तृत विवरण (तालिका): 

र्‍याङ्क	अपरेटरको नाम	कुल ग्राहक संख्या	बजार हिस्सा (%)
१	वर्ल्डलिङ्क कम्युनिकेसन्स लिमिटेड	१०,७८,७०९	३०.९३%
२	नेपाल दूरसञ्चार कम्पनी लिमिटेड (नेपाल टेलिकम)	३,८३,१०१	१०.९८%
३	डिश मिडिया नेटवर्क लिमिटेड	३,६९,२१८	१०.५९%
४	भायनेट कम्युनिकेसन लिमिटेड	३,६३,०३७	१०.४१%
५	क्लासिक टेक प्रा. लि.	२,८६,९५३	८.२३%
६	सुबिसु केबलनेट लिमिटेड	२,६४,८४९	७.५९%
७	वेबसर्फर नेपाल कम्युनिकेसन सिस्टम प्रा. लि.	१,७३,४६२	४.९७%
८	टेकमाइन्ड्स नेटवर्क प्रा. लि.	१,१७,०७८	३.३६%
९	वाइफाइ नेपाल प्रा. लि.	१,११,४६४	३.२०%
१०	सी. जी. कम्युनिकेसन्स लिमिटेड	९०,२०६	२.५९%
११	ब्रोडलिङ्क नेटवर्क एन्ड कम्युनिकेसन लिमिटेड	५५,७६७	१.६०%
१२	सजीलो नेट प्रा. लि.	४३,७२५	१.२५%
१३	फाइबरवर्ल्ड कम्युनिकेसन प्रा. लि.	३९,६४१	१.१४%
१४	अन्य (साना अपरेटरहरू)	२७,९१६	०.८०%
१५	कनेक्ट नेपाल नेटवर्क प्रा. लि.	२२,००९	०.६३%
१६	एरोजनेट प्रा. लि.	१४,२४२	०.४१%
१७	एभरेस्ट वायरलेस नेटवर्क प्रा. लि.	१४,१७५	०.४१%
१८	फस्टलङ्क कम्युनिकेसन्स प्रा. लि.	१०,२१३	०.२९%
१९	पोखरा इन्टरनेट प्रा. लि.	१०,१७७	०.२९%
२०	चित्रवन युनिक नेट प्रा. लि.	६,१९०	०.१८%
२१	आई. जोन प्रा. लि.	५,८४०	०.१७%
-	कुल जम्मा	३४,८७,९७२	१००%

प्रविधिमा फाइबरको एकछत्र राज

तथ्याङ्क अनुसार नेपाली उपभोक्ताहरू तीव्र गतिको फाइबर इन्टरनेटतर्फ पूर्ण रूपमा आकर्षित भएको देखिन्छ । कुल ३४ लाख ८७ हजार ९७२ ग्राहकमध्ये ३४ लाख ५६ हजार १ जनाले फाइबर इन्टरनेट प्रयोग गरिरहेका छन् ।

विगतमा लोकप्रिय रहेको एडीएसएल र केबल प्रविधिमा अब देशैभरि गरेर मात्र ३३० ग्राहक बाँकी छन्, जसमा नेपाल टेलिकमका ३२९ र वर्ल्डलिङ्कको १ ग्राहक मात्र छन् । त्यस्तै, वायरलेस प्रविधिको इन्टरनेट प्रयोग गर्ने ग्राहकको संख्या ३१ हजार ६४१ छ, जसमा नेपाल टेलिकमको हिस्सा २८ हजार ६०३ ग्राहक सबैभन्दा बढी छ ।

नेपालमा कुल फिक्सड ब्रोडब्यान्ड ग्राहकको संख्या ३४ लाख ८७ हजार ९७२ पुगेको छ । यसमध्ये सबैभन्दा ठूलो हिस्सा फाइबर इन्टरनेट को रहेको छ, जसको संख्या ३४ लाख ५६ हजार १ छ । प्रविधिको विकाससँगै पुरानो एडीएसएल,केबल र वायरलेस इन्टरनेट प्रयोगकर्ताको संख्या भने निकै न्यून बिन्दुमा झरेको देखिन्छ ।